रामचन्द्र समूहमा मन्त्री छान्न सकस, कोषाध्यक्ष सीतादेवीको पनि दाबी

काठमाडौं । नेपाली कांग्रेसका सभापति शेरबहादुर देउवाले प्रचण्ड सरकारमा रामचन्द्र पौडेल समूहबाट चार जना मन्त्री बनाउने तयारी गरेका छन् । तर, पौडेल समूहमा मन्त्री छनौट गर्न भने निक्कै सकस भएको नेताहरुले बताएका छन् ।पौडेल समूहले प्रचण्ड सरकारमा पार्टीले पाउने मन्त्रालय मध्ये ४० प्रतिशत आफूले पाउनु पर्ने माग गरेको छ । पौडेल समूहले प्रचण्ड सरकारमा पार्टीले १२ मन्त्रालय पाए ५ र १३ पाए ६ मन्त्री आफ्नो समूहबाट हुनु पर्ने माग गरेको छ ।तर, देउवाले चार मन्त्री दिने तयारी गरेका छन् । पौडेल समूहबाट शेखर कोइराला पहिलो चरणमा नै मन्त्री बन्ने पक्का भइसकेको छ । उनी परराष्ट्र मन्त्री हुने छन् ।बाँकी तीन मन्त्रालयका लागि दावेदार नेताहरु धेरै रहेको एक केन्द्रीय सदस्यले बताएका छन् ।

पौडेल समूहबाट कोषाध्यक्षमा निवार्चित सीतादेवी यादवले पनि मन्त्रीमा दाबी गरेकी छन् । मन्त्रीमा तपाईको पनि दाबी हो भन्ने अनलाइनखबरको प्रश्नमा यादवले यो विषय पार्टीले निर्णय गर्ने र अहिले बैठक नै नबसेको भन्दै पन्छिइन् ।स्रोतका अनुसार पौडेल समूहले पाउने मन्त्रीमा प्रकाशमान सिंह, डा. रामशरण महतले पनि आफ्नो कोटा खोजेका छन् । उपचारपछि आराम गरिरहेका महामन्त्री शशांक कोइरालाले दीपक गिरीको नाम सिफारिस गरेका छन् ।पौडेल समूहका एक नेताका अनुसार दाबेदार धेरै भएकाले मन्त्री छनौट गर्न अहिले निकै सकस भइरहेको छ ।