सरकार र संघीय गठवन्धन ३ बुँदे सहमति कार्यान्वयनसम्बन्धी छलफलमा

३ बुँदे सहमति कार्यान्वयनका बिषयमा सरकार र मधेसी मोर्चासहितको संघीय गठवन्धनबीच अहिले बार्ता भइरहेको छ । सानो आकारको मन्त्रिपरिषद् बिस्तार गरेको भोली पल्टै प्रधानमन्त्री पुष्पकमल दाहालले मधेसी मोर्चासहितको गठवन्धनसंग सहमति कार्यान्वयनवारे छलफल गर्न बैठक बोलाउनुभएको हो । सपथ लिएको भोलीपल्टै प्रधानमन्त्रीले मधेसको मुद्धा सम्वोधनमा देखाएको चासोले बिश्वासको वातावरण बनेको भन्दै गठवन्धन नेताहरु खुसी हुँदै वार्तामा पुगेका छन् । सिंहदरवारस्थित प्रधानमन्त्री कार्यालयमा जारी बैठकमा मधेसको मुद्धा सम्वोधनमा सरकारकातर्फबाट गरिने निर्णयवारे छलफल केन्द्रित भएको फोरम गणतान्त्रिकका अध्यक्ष राजकिशोर यादवले जानकारी दिनुभयो । संघीय गठवन्धनले मधेस आन्दोलनका क्रममा मृत्यु भएकाहरुलाई शहिद घोषणा, घाइतेहरुको उपचार तथा क्षतिपूर्ति, झुठा मुद्धा फिर्ता लगायत माग सरकारले तत्काल सम्बोधन गर्नुपर्ने बताएका थिए । संविधान कार्यान्वयनको बिषय प्रक्रियागत रुपमा हुने भएपनि तत्काल गर्न सकिने बिषयलाई मन्त्रिपरिषद्को पहिलो वा दोस्रो बैठकबाटै सम्वोधन गरिनुपर्ने माग गठवन्धनले उठाउदै आएको थियो । ३ बुँदे सहमतिमा आन्दोलनरत पक्षबाट हस्ताक्षर गरेका ८ दलका नेताहरुलाई उपप्रधान तथा गृहमन्त्री बिमलेन्द्र निधीले गएराती ११ बजे टेलिफोन गरि बैठकमा आउन खवर गर्नुभएको थियो । सरकारले गरेका सहमति कार्यान्वयनमा ढिलाई भएको सन्देश नजाओस भनेर सरकार गठन भएको अर्काे दिन नै मधेसी मोर्चासहितको गठवन्धनलाई बार्तामा बोलाइएको एक मन्त्रीले बताए । मधेसको समस्या समाधानमा अग्रणी भूमिका खेल्न सके मधेस राजनीतिमा जस पाइने बुझेर उपप्रधान तथा गृहमन्त्री निधीले आन्दोलनरत पक्षलाई मिलाउन बिशेष पहल शुरु गर्नुभएको उहाँका निकटवर्तीहरुले बताएका छन् । मन्त्री निधीले अव बस्ने मन्त्रिपरिषद् बैठकबाटै मधेस आन्दोलनमा घाइते भएकाहरुको उपचार खर्च बापतको ६ करोड रुपैयाँ समेत निकासाको निर्णय गराउने आश्वासन मधेसी नेताहरुलाई दिइसकेको स्रोतको दावी छ ।