मन्त्री छान्न नसक्दा काँग्रेस र माओवादी केन्द्र बिहानैबाट छलफलमा

सत्तागठबन्धनका प्रमुख दल नेपाली कांग्रेस र माओवादी केन्द्रलाई मन्त्री छान्न सकस परेको छ ।
आज पनि बिहानैदेखि मन्त्री छान्न दुईदलका नेताहरु छलफलमा जुट्ने भएका छन् । दलभित्र मन्त्रीका आकांक्षीहरु धेरै देखिएपछि कांग्रेसका सभापति शेरबहादुर देउवा र माओवादी केन्द्रका अध्यक्ष प्रधानमन्त्री पुष्पकमल दाहाल प्रचण्ड अप्ठ्यारोमा पर्नु भएको छ । माओवादीका कुरा नमिलेका कारण नै हिजो जनार्दन शर्मा र राम कार्कीको सपथ रोकिएको थियो ।
माओवादीले ८ मन्त्रालय पाएपनि मन्त्री बन्ने चाहना राख्ने आकांक्षीको संख्या ३ दर्जनभन्दा बढी रहेको छ । पहिला मन्त्री भएकालाई दोहो¥याउने वा नयाँ नाम पठाउने भन्नेमा विवाद छ । मन्त्रीका विषयमा टुङ्गो लगाउन आज पनि हेडक्वार्टरको बैठक बस्ने प्रधानमन्त्री प्रचण्डको सचिवालयले जनाएको छ ।
नेपाली कांग्रेसमा पनि मन्त्री छान्न ठूलो विवाद देखिएको छ । हिजो चारजनालाई मन्त्री पठाउन चाहेपनि दुई जनाले मात्रै सपथ लिएका छन् । कांग्रेस नेता अर्जुननरसिंह केसी आफूले खोजेको जस्तो मन्त्रालय नपाएपछि सपथ लिनु भएन । नेता रामचन्दै पौडेल आफुखुसी मन्त्री छानेको भन्दै असन्तुष्ट बन्नु भएको छ ।
कांग्रेसले १३ मन्त्रालय पाएकोमा पार्टीभित्र पनि गुटगत भागबण्डा गर्नुपर्ने देखिएको छ ।  पौडेल पक्षले न्यूनतम ५ मन्त्रालय अर्थात ४० प्रतिशतको हिस्सा माग गरेको छ । देउवा ४ मन्त्रालयमात्रै दिने पक्षमा देखिनु भएको छ ।
कांग्रेसको भागमा गृहसहित, रक्षा, परराष्ट्र, शिक्षा, स्थानीय विकास, भौतिक पूर्वाधार तथा यातायात, शान्ति र खानेपानी तथा पर्यटन मन्त्रालय परेका छन् भने माओवादीले प्रधानमन्त्री सहित, अर्थ, सूचना तथा सञ्चार, युवा तथा खेलकुद, वन, ऊर्जा, कानुन र सहकारी मन्त्रालय राख्ने भएको छ