उपप्रधानमन्त्री महरा चीन जाँदै

उपप्रधान एवं अर्थमन्त्री कृष्णबहादुर महरा आज चीन जाँदै हुनुहुन्छ । चिनियाँ राष्ट्रपति र प्रधानमन्त्रीलाई नेपाल भ्रमण गराउने विश्वसनीय वातावरण तयार पार्न तथा चिनियाँ पक्षलाई भ्रमणबारे आश्वस्त पार्न प्रधानमन्त्रीको विशेष दूतका रुपमा अर्थमन्त्री महरा आज चीन जान लाग्नुभएको हो । परराष्ट्र मन्त्रालयका सहसचिव भविन्द्र अर्याल सहितलाई सहभागी गराएर महरा विहान ११ वजे चीन प्रस्थान गर्नुहुने उहाँको निजी सचिवालयले जनाएको छ । चीनमा रहँदा महराले नेपाल चीन सम्पुर्ण पक्षका साथै राष्ट्रपति सि जिनपिङको नेपाल भ्रमणका सम्वन्धमा केन्द्रीत रहेर त्यहाँका उच्च अधिकारीहरुसंग छलफल गर्नुहुने परराष्ट्रसचिव शंकरदास वैरागीले जानकारी दिनुभयो । राष्ट्रपति विद्यादेवी भण्डारी र प्रधानमन्त्री पुष्पकमल दाहालको औपचारिक निमन्त्रणा समकक्षीका लागि महराले चीन सरकारलाई हस्तान्तरण गर्ने कार्यक्रम रहेको परराष्ट्र मन्त्रालयले जनाएको छ ।