सभामुखद्वारा राष्ट्रपति, देउवा र दाहालसँग छुट्टाछुट्टै भेटवार्ता

दलहरुबीच विवाद चर्किरहेका बेला सभामुख ओनसरी घर्तीले सहमति जुटाउन पहल तीब्र पार्नुभएको छ । यसैक्रममा सभामुख घर्तिले आज राष्ट्रपति, कंग्रेस सभापति एवं माओवादी केन्द्रका अध्यक्षसँग छुट्टाछुट्टै छलफल गर्नुभएको हो । भोलिका लागि निर्धारित व्यवस्थापिका संसद बैठकको कार्यसूचीलाई लिएर दलहरुबीच मतभेद भइरहँदा सभामुख घर्तीले सहमति जुटाउन हिजोबाट सक्रियता बढाउनुभएको थियो । बजेटसँग सम्वन्धित विधेयक पारित नभई अविश्वासको प्रस्तावमा छलफल हुन नसक्ने सत्तापक्षको अडान तथा अविश्वास प्रस्तावलाई पहिलो पेश गर्नुपर्ने कंग्रेस र माओवादी केन्द्रको अडानका कारण कार्यसूचीमा मतभेद भएको हो । सभामुख घर्तीले पछिल्लो अबस्थाबारे शितल निवास पुगेर राष्ट्रपतिसँग छलफल गर्नुभएको उहाँका प्रेस सल्लाहकार बबिन शर्माले जानकारी दिनुभयो । राष्ट्रपतिसँगको भेटमा सभामुख घर्तीले संसदमा भइरहेका पछिल्ला गतिविधि र सहमतिका प्रयासबारे जानकारी गराउनुभएको थियो । हिजो प्रधानमन्त्री केपी ओलीसँग परामर्शमा सहमति भए कार्यसूची परिवर्तन गर्न सकिने जनाउ दिएकी सभामुख घर्तीले आज विहान माओवादी केन्द्रका अध्यक्ष पुष्पकमल दाहाल र नेपाली कंग्रेसका सभापति शेरवहादुर देउवासँग उहाँहरुकै निवास पुगेर छलफल गर्नुभयो । छलफलका क्रममा घर्तीले कार्यसूचीको विवाद सहमतिमा टुङ्ग्याउन दुवै नेतालाई आग्रह गर्नुभएको छ ।